هايه بناتك يا وطن هايه
    الخميس 13 فبراير / شباط 2020 - 19:51
    ميسون نعيم الرومي
    -(هايه بناتك يا وطن هايه)-
    هيبه للشرف وايعلن الرايه
    -(هايه بناتك يا وطن هايه)-
    وحدتهن بـَ الف وايرفعن الرايه
    ***
    انشوده الثورتك يعراق غنواته
    ابنيات الوطن ثـَـرْوِتـَه اومايه
    سندن ثورتك بالروح بالخدمات
    واليفتي چـذب لابـد إله غايـه
    ***
    أم آنه اوإخت وآنه الحـْبـَيبـَه
    مدفوع الثمن والطشر ادمايه
    يوميه راي اواله متقصد التخريب
    كافي اوبس بعد ملينه الروايه
    ***
    تاريخ انكتب والشهدت الأزمان
    كل طاغي حكم لازم إله انهايه
    جونه امن العدم باگونه كتلونه
    ذبحوا بالشباب اوصارت اسبايه
    ***
    أحزاب الغدر، متفقه والحكام
    عَ الكرسي لزگ والسلطه نسايه
    فاليحيى العراق اويحيى ثواره
    عينوني يخوتي اوهتـْفـوا ويايه
    ***
    -(هايه شبابك يا وطن هايه)-
    بيهم نفتخر وانعلي بالرايه
    -(هايه بناتك يا وطن هايه)-
    بيهن نفتخر وانعلي بالرايه

    الى بنات ونساء العراق الثائرات اهديها
    13/شباط/2020
    ســــــــــــــــــتوكهولم

    © 2005 - 2020 Copyrights akhbaar.org all right reserved
    Designed by Ayoub media