چـَـم دوب..؟؟
    الخميس 13 أغسطس / آب 2020 - 11:38
    ميسون نعيم الرومي
    بالحايط مسحـْـنـَه الإيد
    والعمر شمعاته طفـَـن
    شـمعه ابأثـر شـمعه
    غابت شمسنه وارحلت
    چمدوب الظلم .. والظلمه؟ 
    ***
    ليوين رايح يا وطن؟
    ليوين غارگ بالمحن..
    والشعب يسبح .. ابدمه
    دولة رعب.. نفس الفلم
    بيهه القتل..حرفه اصبحت
    والناس .. ما همهه
    ***
    اتبدلت اوجوه اشكثر؟
    نفس النهج ع الخسه متعلمه 
    عصابات اتريست..
    تنهب نهب ..للبوگ ممتهنه
    تخطف اوتذبح كل وكت 
    بالموت متحزمه
    ***
    الوطن ينزف يظل
    والشعب دمه مانشف
    حروب امعدده..جوع او مرض
    ايتام او ارامل تنتحب..
    تشخص للسمه..
    ترجه ابنهه ايسلمه
    ***
    هم گلنه بيه الأمل..!
    بلكي اولعل ينصفـنه
    يمته يربي نتعظ وانعوف طيبتنه
    من قال اوبله ياهو اليجي يخدعنه
    نتبرع اوننطي بالفرص
    نشبع ظلم .. نحلم ابجنه
    ***
    ولدك تموت اوتنذبح
    من محنه تدخل محنه
    چم دوب گلي يا وطن
    تاخذنه چلمه واترد !!
    چم دوب الذبح والظلمه 
    چم دوب..؟؟

     11 / آب / 2020  
    ســــــــــــــــــتوكهولم
    © 2005 - 2024 Copyrights akhbaar.org all right reserved
    Designed by Ayoub media