اقترح على السيد تشكيل الثلثين الشعبية المغيرة للدستور"!
    الجمعة 5 أغسطس / آب 2022 - 20:15
    صائب خليل
    قبل كل شي.. سيدنا انت ليش تريد تغير الدستور؟ هو منو معبّر الدستور حتى تنطيه انت قيمة وتغيره؟ أنت من تريد "تغير الدستور" يعني كأنك ناوي تطيعه، وهاي مو زينة لهيبتك كدام ربعك وكدام خصومك. شوف صدام شلون كسب هيبته؟ گال:"القانون شنو القانون؟ القانون جرة قلم!"
    وانت مو اقل منه.. هو "جرة قلم" وأنت "گصگوصة"! 

    والدستور بالعراق ملطشة الك ولغيرك. مثلا الدستور يشترط بالمرشحين أن يكونوا ما عدهم جنسية اجنبية! أن يكونوا "حسني السلوك والسمعة".. ان ترشحهم "الكتلة النيابية الأكبر عددا".. هسه هاي "الكلاوات" منو مگلبها رحمة لجدك؟

    وانت الك بيها مبادرات يذكرها لك التاريخ. مثلا لما ردت ترشح عبد المهدي (او اجتك تعليمات بترشيحه) وهو ما كان لا بالكتلة الاكبر ولا احد حدد الكتلة الأكبر بعد، فأنت طلعت ونفخت صدرك، وصرخت بقولتك المأثورة: "الشعب اكبر من الكتلة الأكبر"!.. ومشت!!

    هسه شنو يمنعك ان ترشح اللي تريده (او اللي موصيك عليه) وإذا "الكتلة الأكبر" فتحت حلكها، هم اصرخ بيها: "الشعب اكبر من الكتلة الأكبر"!! وهمه من يسمعون بيها "شعب"، ينلصمون رأسا! وإذا احد فتح حلگه على ابو "كتلة المكون الأكبر" سوي نفسك شريف وطلعله الدستور واسأله وين بالدستور "كتلة المكون الأكبر"؟.. واستلمهم وطلعهم همه اللي مخالفين الدستور ولازم يتحاكمون الخ.. يعني اخذهم بالصوت.. وهمه فعلا ضاربين الدستور بالقندرة، يعني تكدر انت هم شوكت ما تريد تجلقه بكل اطمئنان.

    يعني رأيي، بلا تعلوم، انه لا تضل تحجي بالدستور حتى لو جذب. ما يليق برئيس عصابة محترم ان يحجي بالدستور والقانون. هو هيبته وقيمته بكسر هاي الأشياء.. عوفها "للمثقفين" القشامر. انت عندك "الكصكوصة"! إذا تحجي بالدستور تعتبر إهانة "للگصگوصة"!

    وعلى كل حال، اذا مصر تغير الدستور، فدير بالك تسويها بالطرق الدستورية! كلش تقلل قيمتك خاصة بين ربعك! إذا كلش كلش، ارفع بالمظاهرة مالتك شعار أن التظاهرة هي "الثلثين الشعبية المغيرة للدستور"! مو صعبة.. انتو مو قبل اسبوع رفعتوا شعار ان التظاهرات تشكل "الثلث (الشعبي) المعطل"؟ هسه ثلاث ارباع العالم عبالهه صدك اكو "ثلث شعبي"! سويهم "الثلثين الشعبي المغير"!! هو منو حسبلك الثلث حتى يحسب الثلثين؟ يكللك ان سرقت اسرق جمل، وانت لازم تستغل فكرتك المبدعة لأقصى درجة، وبدل "ثلث شعبي" گول "ثلثين شعبية" وهالستة على هالستين، وهالثلث مثل الثلثين، وفضت راحت.

    بس جيب عدنان الطائي يطلع يعوي بمقدمة برنامجه على "الثلثين الشعبية المغيرة للدستور" وكم "محلل استراتيجي" من ذولة اللگامة المختصين بهيج سفالات، وهمه يكرروها ويعيدوها إلى أن تمشي على الناس مثل الورد، وتصير هي الدستور!
    هيج شغل العصابات "القح"، خوما آني اعلمك لا سامح الله؟ وفقك الله ياابن بنت رسول الله!
    [[article_title_text]]


    © 2005 - 2024 Copyrights akhbaar.org all right reserved
    Designed by Ayoub media