اكو جماعه من اهل البصره بنو جامع بفلوسهم وتعبو عليه كلش هواي.. وطلبو من احد الشيوخ يجي يسويلهم  قرايه باول يوم لتدشينه ... والرجال ماقصر واجه وسولفلهم عن نبي موسى وقصته ويه اليهود ... وشگد شلعو گلبه ودمروهه.. ساعه انريد انشوف الله ..ها انريد بصل ..لا انريد عدس...انريد قثاء... ولحد يسالني شنو قثاء  وروح الزايره ماعرفه.. ومانريد المن والسلوى مو كلش طيب , انريد خبز... الشيخ ايسولف ساعه وفحطان وحجي كاظم ايفر براسه, وينفخ اتگول عربيد ضايج... وگبل لاتخلص القرايه.. صاح على الشيخ.. شيخنه تره واخو زينب اني هم انتعل والديه بالچامع مو بس حچي موسى .. فضحك الجميع بشدة على قوله حتى اهتزت شوارع خمسه ميل والابله واطراف الكزيزه وفشل الحجي المسكين فشلة الذين ضرطو وهم صافنون ...لان طول الوکت عباله الشيخ يمدح بصويحبه حجي موسى!!!!
 
قبل فتره گال الغايد اللاگف طين اكو مليشيات حكوميه تقتل السنه وترفع عن ذكر اسمها وهو سمين, انوب رد وگال مليشيات وكحه وماتستحي ,واحنه ندري وحجي كاظم هم يدري وحسنه ام الروبه علمت من عجايز متجحفله في كسره وعطش بان المارد گلب السيد ومخليه يطحر مثل الحامل بتوم وجيري ,خروج الخزعلي من جوه عبايته وحسب نظرية النسبيه الگرگريه اليطلع عن امره وخيمته حكمه حكم السكران وكافر بدون  نقاش اذا صح التفسير حبيبي , واحنه عودنه السيد البهل على هاي المشيچيخات من زمان وكلما ينسونه الجماعه بالاخبار ايظل ايخيط ويخربط  ويرافس بالنجف خاطر يطلع بالتلفزيون لانه صار معروف ومايتحمل يبتعد عن تصريحاته العنچوقيه وتركيز الاعلام على انتصارات الحشد دمر نفساويته ونطعجت فد دور ومن كثر ضوجته ظل ياخذ الروحه سيلفي ويسوي شير بالفيس بوك حتى يجمع اكبر عدد لايكات مباركه ودعوات اللوگيه.

گبل ايسمونه بقناة العربية القائد الشيعي الشاب وهو فرحان اوي على الحكايه دي واشتهر شهيرة هيفاء وهبي في معلقتها..  بوس الواوا.. وكل شويه وزعلان ورادينه ومليشيات وكحه ومليشيات حبابه وبت عشاير, وسرايا سلام وشايله صواريخ ...چا سريا الحرب شتشيل بعد خالك روس فچل نووي... وهو ساعاته مو سوه ... ويدولغ هواي مثل حجي كاظم.. ومن يصحه هاي الله الكتبهه علينه.... ها جمد قواته ها موع  قواته, ها علب قواته... ها هدّ السيد الزموه... ها گعد السيد حاجوهه ... نحمده ونشكره على هاي الغسمه المصخمه , هو هم توفيقنه دقن, ويذب علينه وين التعبان والبيه شمره ونرجسي... سبحانه ابو خيمة الزرگه بعد هاي المصايب اربعين سنه ضم النه مقتدى وعمار الي ورثو الشعب الفقير مثل ماورثو عمايمهم ولعبو بينه لعب چعاب... بيك وبالطنب.

ولان هاي المره حجي هادي الاصيل شدّ حزامه هو والخزعلي والزلم الخشنه وعافو الاول والتالي وحلفو مايردون الا يسحلون كل جرابيع العوجه وعشيرة ال ابو نعييل الخونه والبو عافظ وبيگات العرك الزحلاوي ,انسرقت الاضواء من صاحبنه ..فتفتقت قريحته على فكرة جمع التواقيع ضد زيارة السفير الامريكي بدل جمع التيار ومجاهدة الدواعش الساقطين ولد الساقطين.... لا والكارثه ربعه ايگولون احنه شيگول السيد حاضرين حتى لو ايريدنه انصير ويه الدواعش حاضرين.... جيره اي والله جيره .

عمي خل ايروحون  ناس اچاويد للسيد وياخذون جم شگره من لبنان ويطيحن على مقتدى ويبوسن الواوا  ويخلصنه بلكي يموع قواته... لان اذا خذل الشيعه بهاي الشدّه ..ماراح ايسامحونه لو مو ابن السيد لو يطلع ابن الله؟؟

 فرحان العراقي
امير الفقراء