ام الشهيد اتصيح عينونه
    الأحد 13 أكتوبر / تشرين الأول 2019 - 20:33
    ميسون نعيم الرومي
    عريس وابدمه يحـَنـْونـَه – لفـّوا بالعلم وامسلهم اعيونه
    غاد الچفن ليغاد فدوه الگذلته – يجناز انتظر خل ربعه يزفونه
    لا چنه كبر وافرحتي بسنينه – طفو شمعته وانخطف يا لونه
    ام الشهيد اتصيح عينونه
    عريس وابدمه يحـَنـْونـَه
    ***
    لفـّوا بالعلم واحلامه خِنگوهه – امحسر يا عـُمـُر واسنينه عـدْموهه
    مدرسته بچت والكتب لموهه – اصحابه اوهله .. ابتابوته حطوهه
    يجناز انتظر ضحكاته جمعوهَه – احلامه،والدمع،ع الگبر طشوهه
    طفو شمعته وانخطف يا لونه
    ام الشهيد اتصيح عينونه
    ***
    لا شغل عدنه اولا عمل – بعده المخطط ما كمل
    امعمم اوقاط او(فخفخه) – كلهم حثاله ابلا أصل
    ذبحوا ولدنه يا شعب – جرح الوطن ما يندمل
    بشوية چذب خدعونه
    ام الشهيد اتصيح عينونه
    ***
    -(مهدي اوصالح والربع) – امروا ابقتلك يا شعب
    أملاك وافلوس املتله – وانت الك جوع اورعب
    تگدر حرامي اتأمنه؟ - لو صدگت مـَـيضل عـَـتب
    وعدوا بالوعد باچراوينسونه
    باعوه العراق اشلون يحمونه
    ام الشهيد اتصيح عينونه
    جمع او فرد فدوه اله اولعيونه
    عريس وابدمه يحـَنـْونـَه

    11/ اكتوبر/2019
    ســــــــــــــتوكهولم

    © 2005 - 2019 Copyrights akhbaar.org all right reserved
    Designed by Ayoub media