مجلس أمن يستنكر!!
    الخميس 20 فبراير / شباط 2020 - 06:37
    ميسون نعيم الرومي
    -(أمريكا) تـَـدْعو، ومجلس أمن يستنكر!
    -(هـيـئـة أمم) تترقب ، (اوربا) ما تگدر!
    احـزاب السـياسـَـه اوسـلطـَة الأذنـاب
    بالقتل تتفنن..او للشعب تتحـَـلـّـف اوتغدر
    ***
    اولاد العراق ابصدر عريان والأعلام
    دمهم هالجـره بالسـاحه صار انهـِـر
    شـَـدّوا بالجروح ابـقـِـوَّه وابتصميم
    اتحدوا بالرصاص ابعزم واعدادهم تكثر
    ***
    حلفوا بالشهيد..ابدمه ..مـَـيرجعون
    تغيير النظام امن الجذر..المطلب الأكبر
    -(عيب امن الشهيد اشلون..ما نرجع)-
    كل ثـائـر حـِـلـَـف..گالهه اوكـَـرّر
    ***
    يا جيل الشباب..التاج فوگ الراس
    عـَلـْمـَوا شجاعه للزمن..والبيهم اليشكر
    يا هـيـبـَة شـعـب..يافخـر للأجـيال
    للوطن انتوا الأمل..امن الباغي يتحرر
    ***
    عريتوا الوجوه التسرق ابإسم الدين
    لايران الولاء..اوعَ الشـعب تـتـنمـَّـر
    ابـنـيات العراق او ولده متحديـن
    يبنون الوطن واعراقـْـنـَه اليـزهـر
    واعراقنه اليزهر

    19/شباط/2020
    ســـــــــــــتوكهولم
    © 2005 - 2020 Copyrights akhbaar.org all right reserved
    Designed by Ayoub media