وَرْد الربـيـع
    السبت 6 مارس / أذار 2021 - 16:58
    ميسون نعيم الرومي
    ورد الربيع ايميل لوفات من يـَـمـَّـه
    تشرق شمس تشرين لوضحك سنـَّـه
    نـَـدَّه الفـَـجر محلاه ! بجبينه ضوه
    أسـمـَـر كريم الإيد .. چـَـن مـِزنـَه
    ***
    الشـَعـَـر عَ الوجنات چـَـن ليل اوگـمر
    رِقـَّه اوترافه اوسحر! يكتل كتل حِسنه
    نـَـثــْر اوشـِـعر چلماته ! لو يحچي غزل
    قـِـدّاح او ورد لوفات ! معجون بالحنـَّه
    ***
    يا نسمة صبح .. (يـبـْـن) بغداد يمدلل
    بخدوده نهـَـر .. من كوثــَر الجـَّـنه
    على شاطي النهر والإيد تحضن إيد
    بسـنـيـن العمر عـَهـْـد اوتعاهـَـدنـَه
    ***
    سيوف او تـِـرامي العـيـن واويلاه
    يخـْـزر خـَـزر واتعـدَّه من يـمنه
    ابهيده من تمشي دلع مغرور يمدلل
    لا چن ربينه سوه اولا چن تعاهدنه
    ***
    ثاريهه الخيانه طبع اوطبع من طبعه
    وافـنـون امعدده والغـَـدر من فـَـنـَّـه
    چم جرح الك بالگلب!هاك احسب اواشبر
    ونــّات ما إلهن عدد ونـَّـه ابأثر وَنـَّـه
    ونـَّـه ابأثر وَنـَّه


    5/آذار/2021
    ســــــــــــــــتوكهولم

    © 2005 - 2024 Copyrights akhbaar.org all right reserved
    Designed by Ayoub media