والله لو آني من المالكي اعلن حالة طوارئ واحل البرلمان ومخالس المحافظات واوقف العمل بالدستور والغي جميع اشكال الديمقراطيه والأخوه الكرد اكلهم اذا كدرتوا تحصلون على دوله مستقله معترف بها من الامم المتحدة فانا اول المباركين لكم واخليهه تعلك بيناتهم بالماستاو واحرك كلب اوغلو و اردوغان وابيس بكل الحراميه والقتله والمنافقين واشباه المثقفين واشباه الصحفيين والمعممين بالجذب واللابسين افنديه وهمه بالاصل معممين واللابسين عمامه وهمه بالاصل افنديه واوقف خدمة النت واشوش على الفضائيات وانطي مجال شويه للعركجيه والكيوليه واغلق الحسينيات والجوامع المبنيه حواسم واشيل بيوت الحواسم واسكنهم ببيوت الراح يكلبون من السياسيين بعد ان اقطعهه ستينات باستثناء حكومي واقلل من التكسيات والكيات وامنع استيراد السايبات واعدم فد عشره من اهل المولدات وخلي بكل منطقه عشر مخبرين ومخبرات واي واحد يسوي لقاء وي اي فضائيه ابوه اسمطه وما انسه المحللين الستراتيجيين والخبراء القانونيين والعسكريين هم اكطلي جم واحد منهم وامنع لبس القوط برباط بغير رباط امنعهه وافرض لبس السفاري لما للسفاري من اهميه تذكر في ضَبط الامن واي واحد يمدح صدام لو البعث اكص لسانه واعلكه بركبته واهدم كبر صدام اسويه علوه مال سمج والي يعلك صوره مال خامنئي اشحته لايران اكله هنااااك روح علكهه يم روح اهلك والمنظمات الانسانيه ومنظمات حقوق الانسان ومنظمة العفو الدوليه ارحب بدخولهم ويوميه اكتل واحد منهم وذبهه براس المنظمات الارهابيه وخليهم يفلتون طبعا منظمات المجتمع المدني ما اخليلهم طفاي النار لو يلحك يلبس لباسه لو ماكو يموت عريان واي واحد يصير رامبو براسي ويطلع يفسي بالفضائيات اعدمه واذا جان كاعد بالخارج ادز عليه جم واحد من يمه يحطوله بعيونه اميري ابو البخاخ الصيني الاصلي واذا ما جاز يرجعوله يحطوله بغير مكان جميع خطب الجمعه اراقبهه اي واحد يجيب طاري الحكومه بالشين اجيبه ابلل ايدي بالبانزين وامسحهه بلحيته واشعل الجداحه يمهه وانطي خمسين ورقه واهده وكله راح احضر خطبة الجمعه الجايه يمك.. اللطم اخففه اخلي فقط بالمناسبات الدينيه الخاصه بالحزن وغير ذلك لازم تاخذ موافقات رسميه وتحدد الزمان والمكان وخط السير واحدده بمده زمنيه خطباء المنابر الدينيه من كافة الالوان يجب عليهم استحصال موافقات اصوليه من مدارسهم تجيز لهم اعتلاء المنبر واوقعهم على تعهد بان لا يتطرق الى مايثير النعرات الطائفيه تحت طائله السجن مع المجرمين واشيل كل الصور والشعارات الي بالشوارع واسمح بصورة بس واحد والي يحب واحد ويريد يحط صورته خل يخليهه بيته ماكو اشكال والي يصير عنده فاتحه ويسد الشارع العام بالجادر ادزله سوات واذا ماشال الجادر وكال احنه عشاير اسحله سحل والي يسوي طسه كدام بيته اكله تعال الحسهه بلسانك والك حق تسوي بيتك نصين اذا جان ميتين متره وفوك اما تسويهن خمسينات لو ستينات افلشهن على راسك وارجع عطلة الحلاقين يوم الاثنين وأضع مسافه قانونيه بين حلاق وحلاق واذا حلاق حجه وي الزبون بدون استئذان اغلاق المحل مع غرامه ماليه واحدد اسعار كشفية الاطباء واهل السونار واغلق مختبر جدعون وأذب كل البي حته المُرضه اربعه ارهاب المُرضه بعدين اطلعهم على راشدي راشدي اكلهم ولكم شنو ماكو بس هذا مختبر ادبسزيه واكرم البنغال الموجودين بكل المستشفيات لان بس همه شرفاء ويشتغلون من كل كلبهم بكل وزارة الصحه ومشتقاتهه وبدون سابق انذار اعدم خمسين مدرس خصوصي من الاسماء الرنانه وراهه اكول اي واحد ياخذ دروس خصوصيه هو خائن لشرف المهنه ومصيره كمصير الخمسين واي مدرس ما يدرس باخلاص وما يكمل المنهج المقرر يطرد من وظيفته بعد ان يقضي مدة شهر سجن داخل تواليت المدرسه مع مديره طبعا وبحراسه مشدده كذلك اقوم بالغاء رفعة العلم مال كل خميس التي لا فائده منها الا ادخال الرعب في نفس الطالب من الصباحيات والتي لم تخلف الا كرها شديدا للعَلم ولمدير المدرسه ايضا اقوم بالغاء الامتحان الوزاري للصفوف المنتهيه جميعها ويمتحن الطالب في الصف الرابع والخامس والسادس اعدادي امتحانا وزاريا موحدا وتجمع درجات المراحل الثلاث وتقسم وياخذ الطالب معدله فمن الظلم ان تحدد دراسة الطالب لمدة اثنا عشر عاما بمعدله في العام الاخير وبذلك يتعرض لظغط نفسي غير مسبوق وخوف وتأتيه الامراض جميعها من كل حدب وصوب في هذه السنه ناهيك عن سرقة الاسئله وهذه هي الكارثه الكبرى التي يتساوى فيها الكرعه وام شعر..اما في وزارة التعليم العالي فقبل كلشي اقوم باغلاق جميع الجامعات الاهليه واوقف العمل بالدراسه المسائيه يعني دراسه بفلوس ماكو لان كلهه كلاوات عدنه بالعراق وراهه اقوم باغلاق جامعات زيك وزاك وزوك لان كل فايده مابيهه هي عباره عن جامعات لاستقطاب الطلبه الفاشلين دراسيا افرض على جميع التدريسيين في الجامعات ان يقوم كل واحد منهم بتاليف كتاب في اختصاصه على الاقل كل اربع سنوات وافتح جمعية التدريسيين القدامى على غرار المحاربين اي واحد ما يقوم بتأليف كتاب اجمده بهاي الجمعيه وما اخلي واحد يصير رئيس قسم اذا ما مألف اربع كتب رصينه وما يصير عميد كليه اذا ما عنده ست او سبع كتب وهكذا دواليك والي الكفه بايكله سطر من كتاب كبل للمحكمه الثقافيه المستحدثه هذه احكامها فقط التشهير والطرد بعد كشف السرقات الادبيه والثقافيه..احل جميع الاوقاف الشيعيه والسنيه والمسيحيه ارجعهه على زمن صدام وزارة الاوقاف والشؤون الدينيه واجيب احمد الكبيسي اخلي وزير واذا رفض اجيب خالد المله واذا رفض المله اجيب الصميدعي بعد ما يتشافه يعني بصريح العباره اخلي على الاوقاف وزير سني والسبب انتم تعرفونه ماكو داعي للشرح اما هيئه الحج والعمره فهؤلاء غير شكل سالفتهم بعدين بس اكلهم الياكله العنز يزَوعه الدباغ..وزارة الداخليه والدفاع ابد ما احجي وياهم لان اني هسه بحاجتهم بس اطلب طلب واحد منهم ان يتخلو عن هواتفهم النقاله اثناء الواجب وخاصه الضباط النجمه والنجمتين الفريفريه..وزارة الكهرباء الغيهه اسويهه وزاره المولدات الاهليه والحكوميه ومن تستعدل الكهرباء شيل وعكط..وزارة الماليه اغير اسمهه الى وزارة الجبايه وارفع عنها صفة السياده وتكون واجباتها فقط جباية الضرائب وتنظيم عمل المصارف فقط اما الكمارك فتكون هيئه منفصله تابعه لرئاسة الوزراء لما لها من اهميه خاصه المنافذ الحدوديه ولم يعد لوزارة الماليه اي دخل بواردات النفط..اوقف صرف جميع رواتب الضمان الاجتماعي في وزاره العمل والشوؤن الاجتماعيه العاطلين المحتاجين الارامل المطلقات لان كلهه تزوير وبوك وكلاوات والناس الصدك محتاجه كلشي ما محصله وارهاق على الميزانيه بلا فايده واضع شروط لهذ المساله صارمه واعدم جم موظف وموظفه وجم مختار من لي يمشون معاملات لغير المستحقين..اعادة تاهيل كامل لوزارتي الصناعه والزراعه واعادة الروح اليهما وخاصه الصناعه بعد الاستعانه بخبرات مشعول الصفحه والبنيد حسين كامل..هسه اهنا راح يسال واحد ويكول شلون راح تسوي كل هذا قابل امريكا والدول الغربيه راح تعوفك بحالك وتتفرج عليك الجواب يكمن في اهم وزاره هي وزاره النفط واليكم ما ساقوم بفعله فيها اولا ساقوم بحل الوزاره وجميع الدوائر التابعه لها واسرح جميع موظفيها بالكنافذ يعني حالهم حال وزارة الاعلام ثانياً اقوم باستدعاء جميع الشركات الامريكيه والبريطانيه والفرنسيه والصينيه والروسيه كل حسب اهميته ولا انسى ابداً احفاد كولبنكيان ساقوم باستدعائهم اكراماً لجدهم واقول لهم مثل ماسوه جدكم تعالو اشتغلوا حته تبنون ملعب بالبصره بالشنافيه بذيل العجل المهم هذه الشركات العملاقه تاتي بجميع كوادرها ومعداتها واقول لهم اعملوا استخرجوا بيعوا النفط كما تشاؤن لكم النصف ولي نصف شرط ان تستثمرون وتبنون داخل العراق وتدعمون العراق في المحافل الدوليه ويكون العراق تحت مظلتكم يعني بصريح العباره الغاء التاميم وارجاع الاحتكار من قبل الشركات الشريفه وهذا ما يتطابق مع وجهة نظر المحلل العاطفي الغير مقوط الاستاذ محمد الثامرالازرق...بقت عندي بس شغله وحده كبل مايحس الاستاذ ابو اسراء آني ماخذ مكانه ويسحلني سحل بقه عندي الممثل الفلته سعد خليفه اجيبه ونزعه ربي ما خلقتني ولبسه حفاضه وخلي يمشي من ساحة الفردوس لساحة الحريه رايح جاي لمدة ثلاث ايام والحاجتين بالحفاضه وراهه نجي نشوف صدك حفاظات دندن سريعة الجفاف والامتصاص.. جير وعسب..وهسه شتكولون بهذه الستراتيجيه الجديده
