مقالات

الله يساعدهم  جماعة ربعنه ,ذيچ الحلغه وصلنه من طبگ جلال الفسيفس وياكم "والحچي ويه المجلس اللعنه" وصارو الاكراد كلهم بچيبكم وچان همكم بس تخلصون من الجعفري وتشوفون واحد ضعيف تلعبون بيه بكيفكم واكيد راح يخربط  لان العراق هوسه وگلتو كلش هينه انزيحه وكت مايعجبنه ولان التيار بعده مامضمون وماچان راضي على تغيير الجعفري , ظليتو تتصلون باطراف موشيعيه خاطر ايصيحون مانريده , مانريده موخوش مانريده, وانتم اتظلون الطلي الحباب بالتحالف, بس السم اينگط من اسنونكم, وطبگ انوب وياكم المطلگ ابو فچ الخايس وعلاوي السطل البعثي ابن البعثي الحاقد هيچ من الله, وانوب عمتكم امريكا دزت الصخله ام اعطوب رايز وختمته, وصار الحچي, يالدعوه رشحو منكم اي واحد غير الجعفري! ليش بویه؟ مانريده مو خوش, وضعيف والعراق راح يحترگ ومن هالحچي ,بس الصدگ خوفكم من باچر لان خالين عينكم على رئاسة الوزراء بس بعد مو هسه لان التيار بعده امعند وياكم وعدكم مشاكل وياه بوکته وحرگ مكاتب وضرب ومناوش وهاي معروفه.

 چبتو المالكي وطلع اصعب من الگبله وبدل ماتركبون على ظهره  صار قوي وصعدت شعبيته بعد ماخلس المستهترين بالشارع وقضه على العصابات ,وصار الي چنتو اتخافون منه وهي شعبيه الحاكم لان تدرون اهلنه مايعرفون من الحكومه احد بس الريس وطگت مقاعد الدعوه لتلاثين ,وطاح حض شعبيتكم للگاع,وبانتخابات الفين وعشره حصلتو بس سبعطعش مقعد ويه فیلق بدر, بس ابو حسن البطل التحق ويه المالكي وظليتو بالضيم ,لاچن استمرت دسايسكم العتيجه ,بس هالمره ماگدرتو تلعبوهه مثل گبل وگدرالمالكي يشكل الحكومة غصبن على خشومكم,انوب شغلتو اصطوانه الامن والخدمات وانبارنا الصامده وصوت السنه سيعلو على كولة ابو الكركري  وره مازار عمار السعوديه والتقه بالملچ الفاطس عبد الله,هسه شگد اطاه  وشنو گله بعدين اتبين, وزار چم دوله خليجيه خاطر ايسوق المجلس للعرب بعد وفاة عبد العزيز الله يرحممممممممه بالفين وتسعه

رديتو لعبتو نفس اللعبه وهالمره ركبتو الجعفري وقيادات الدعوه الغمان الضعاف وتامرتو على المالكي وهم كان صعب تحصلون رئاسة الوزراء طلعتو بلتيقت المقبوليه ,والفريق القوي الي يلعب حديد، وخلي يچي اي واحد  ورتبتوه ويه چلاب القوى والاكراد ,يشنعون بالمالكي وبنفس الدگه السويتوه ويه الجعفري گبل ، وسالفة الموصل وسقوطه اجتكم من الله امسنعّه اذا ماچان الكم ضلع بيه وبتخطيط ربعكم السنه والاكراد , ورتبتوهه ويه الجعفري الشاخط الي عده ثارعتيج وثغافته الشقندحیه مافادته ورجع بدوي مدسمل وصار المجير هو المنسق الاول لازاحت صويحبه المالكي حتى اتصير وحده بوحده وهو مامحصل بالانتخابات لاجیر ولاخفت بتياره الچباحي "الاصلاحي" ومايستحق الخارجيه  بس حصله برطيل على خيانته الرخيصه.

 وحتى تكمل السبحه چبتو اضعف واحد بالدعوه ، العبادي صاحب اول بنطرون دبلماسي رفيع المستوى يخرط خارج القطر ويسوينه علچ بحلوگ الوادم  وهاي خوب گاله گرندايزر المجلس صولاغ اللحیمچی  من مرو على الريس معصور الدثو وره صلاة الظهر وهسه انتم حايرين بالعبادي وره ماصار بيده سوط المرجعيه والتظاهرات ,والله اليدري المؤامره الجايه ضد العبادي يمته تعلنوهه لانهه بدت صار فتره لان فسادكم وبوگاتكم بينت وطلعت خيسته,وراح هم نحچي عليه بگعدات ثانيه ونكمل بالقلم العريض  كلش وروح جدي صيهود المات وماشاف الدفع الرباعی,وگبل لاانسى اگول مرة ثانيه رحمه لاهل روحه المجلسي الي ورچنی على سوالفكم كله... وبعد وبعد چيب كهرباء واخذ  فضايح.
كافي بعد خالکم المندر الجواي تنگع خلي اگوم اشره لان مطرت اول امس طيحت وفگنه كلش وچعله ابخت ضكرى علوش ام بخناگه

فرحان العراقي
امير الفقراء

مؤامرات المجلس ضد الشيعة -1- - فرحان العراقي
08/10/2015 - 20:39 مقالات