د. مؤيد عبد الستار
*ها .. ابو جاسم .. شكتلك .. مو كتلك لا تنتخب ماكو فايدة
- جاسمية جوزي مني .. اني بياحال وانتي لازمة سالفة الانتخابات الماصخة .
*هسه صارت ماصخة .. اني مو كتلك ما نروح للولاية وما ننتخب ، زين ها الخسارة الطاحت براسنه .
- دسكتي .. عبالج خسرانه المهناوية .. هي شكم دينار خسرناهن على الكباب اللي تغدينه بي انا وياج .
* بس الكباب ، جا .. التتن والكهوة اللي شربت بيها ثلاث جايات ، والحلاوة اللي اكلتها ... انته شخليت ما سويته
وجماله صاحبك النايب المحفوظ ما ربح وما راح تحصل المقسوم .
- ولج هسه هو شنو المقسوم ، قصر باشا اعيان ، اشو النايب وعدنه خلك بشت وزوج نعل تسكام ، والله ما قسمهن النا .
* هي هم عايزه الله يقسم حرام ، وفوكاها بشت وزوج نعل .. هي يا الله .. ده كول زيارة ، حجة ، دوا .. خو مو زوج نعل .
- هسه انتي عفتي البشت وجلبتي بالنعل ... هي بت ... الحلال .. ده خليني بدردي .. مو راسي صار طبل من وره لسانج .
* اي ..لساني صار يسوي راسك طبل .. جا شلون تكول جاسمية ام لسان العسل لمن جنت اكلك يا بعد روحي .. ها .. لساني صار كخ ، اكول صدك شراح يصير بالحكومة اذا ما اعترفت امريكا بالانتخابات .
- ده شوف المكرودة .. لج امريكا شعليها بالانتخابات ، هي العركة بين جماعتنا على الكعكة ، امريكا شجابها بالطاري .
* اذا امريكا ما عليها ، لعد منو .. قابل ابويه .. لو النايب مالك اللي ماحصل الكعكة ، وخلانا تي تي مثل ما رحتي جيتي .
- يابه ده جوزي من النايب ، قابل بس هو اللي خسر .. اشو حتى صاحبتج المكبعة خسرت والله ما استجاب الها ولا لدعائها ، ولا للنذر مالها ..مو كالت بالديوان اني ناذره لوجه الله عشر طليان اذبحهن بديوان ابو جويسم . اشو ما تحجين ..نسيتي .. لو بس صاحبي النايب طلع فالصو .
* اي .. الله ما يضرب بحجار .. فوك البوك .. لا بلطوا شارع .. لا سووا مستشفى .. الله ينتقم منهم .
- ليش الله ينتقم منهم . خلي سبحانه وتعالي بعيد عن هالحرامية ، احنا لازم ننتقم منهم وما ننتخبهم .
* جا ليش من اكلك ما ننتخب تكول لا ننتخب ، اشو كل ساعة انت براي والله حيرتني .
- الله لايحير عبده ، شوفي جاسمية آني قصدي لازم ننتخب الاجاويد وما ننتخب الحرامية حتى نرتاح بالسنين الجاية .
* ابو جاسم .. يبين هم تريد تروح للولاية وتاكل كباب .
- والله بعد ما كو فلوس ، كطنة وشيليها من اذانج بعد نروح للولاية وننتخب الحرامية .
** رابط مقال سابق نشر عام 2010 بمناسبة الانتخابات السابقة جدير بالاطلاع ايضا
بشرى سارة ... اختيار رئيس الوزراء صباح غد
http://www.akhbaar.org/home/2010/09/97504.html
